El Tredesin de Marz
Ona antiga tradizion ambrosiana, tramandada del “Libellus de situ civitatis Mediolani, de adventu Barnabæ Apostoli...” la vœur che el 13 marz de l’ann 51 - tri agn inanz che 'l San Peder el rivass a Roma - el San Barnaba l'Apostol l’abbia fondaa la Gesa Milanesa cont el battezà dei primm cristian de Mediolanum.
El
sit dove lՏ sucess lՏ identifigaa da la tradizion cont el spazi dove incϝ la
sorgiss la Basiliga del Sant Eustorg.
Gh'è ona targhetta in su la cà arent a la Basiliga, al numer civegh 8, che la segnala defatt la presenza de on battisteri faa restaurà dal Cardinal Federigh Borromee ind el 1623.
Del font battesimal ne gh'è rimast domà poch tochell che inn conservaa ind i fondamenta del palazz.
La tradizion, però, la tramanda che ‘l San Barnaba l'abbia faa la soa entrada da Porta Oriental, dove l'ha sfidaa i sacerdot pagan cont el piantà ona cros dent ind ona preia magica che i druid doperaven per i so riti, i quai eren anmò viv in quei sit periferigh de la citaa.
L’è confermaa anca segond di studi recent de archeologia, che i sacerdot pagan celtegh doperaven despess i preii magegh, denter i quai incastonaven i so baston incurvaa per tragh auspici di aster in ciel.
Questa preia, consacrada come ona reliquia, l’è rimasta per di secol ind la Basiliga del Sant Dionis, de fondazion santambrosiana. Quand però la Basiliga l’è stada demolida, a la fin del secol XVIII, i Pader Servii l’hann trasportada ind la gesa de la Santa Maria al Paradis, de fondazion ducala, dove la se trova anmò adess, ind el mezz de la navada central.
La tradizion immemora la vœur che in quest dì, che i milanes ciamen “el tredesin de marz”, se metta denter ona cros a imitazion de la prima cros drovada dal San Barnaba, a regordà l’antiga impresa de l’Apostol fondador de la nostra Gesa Milanesa.
I primm attestazion de la devozion per quest dì specifegh, segond el Cattaneo, sarien intorna al 1460, dal Liber Indulgentiarum.
---
Grazie a l’amis Nicola