La Sacra Bibbia, l'Antigh Testament | Liber de la Genesi, Primm Capitol
De la creazion del mond. Distinzion di coss del creat e ‘l so ornament. Formazion de l'omm, miss da Dia a ‘l coo de tutt quell che gh'è in del creat.
1. In principi Dia 'l creè el ciel e la terra.
2. E la terra l’era senza forma e vœuda, e i teneber eren sora la faccia de l’abiss: e 'l Spiret de Dia 'l se moveva sora i acqu.
3. E Dia 'l disè: sia fada la lus. E la lus la fu fada.
4. E Dia 'l vedè, che la lus l’era bona: e 'l separè la lus di teneber.
5. E la lus la ciamè dì, e i teneber i ciamè nocc. E con la sira e la mattina, el fu faa el primm dì.
6. El disè anmò Dia: sia faa el firmament in mezz ai acqu: e 'l separi i acqu di acqu.
7. E Dia 'l fè el firmament, e 'l separè i acqu, i quai eren sotta 'l firmament, da quei che eren sora el firmament. E inscì el fudè faa.
8. E al firmament el dè el nomm de ciel. E de la sira, e de la mattina 'l fu faa el segond dì.