Massema defferenta del pensà di omen
A on omm sodo e sul temp
Certi brav consejer
Ghe daven el parer
De godes el bon temp:
Tant e tant se capiss che i vost ered
Pensen a godel lor;
E per quell che se ved,
Gh'han per vu pocch resguard e pocch amor;
Anzi gh'han fors premura che sballee
Per raspà i vost danee.
Lu el respondè: Vuj mett
In quant a quest ch'el sia
Pù vera che bosia sto vost sospett:
Coss'hoo de fagh se lor se voeuren scoeud
In dagn di soeu fancitt tucc i caprizi,
Che faghen a sò moeud,
al sia de lor e del so pocch giudizi.
Quant a mi certament
No vuj sparmì nient
Per no vess traditor de la mia pell;
Ma no vuj gnanch fà a gara cont i matt
E mandà la mia robba a sacch de gatt,
Come se la fuss robba de rebell.
Diroo ben che quand abbien despiasè
Che possa tirà là
Paricc agn a scampà,
El sò penser l'è defferent del mè;
In su sto pont mo sì,
Che se la stass a mì,
El soggions quell bon vecc,
Avarev tutt el geni a fagh despecc.
--
in Scriver Lombard SL
Massema defferenta del pensar dei omen
A un om sodo e sul temp
Certi brav conseier
Ge daven el parer
De goder-s el bon temp:
Tant e tant se capiss qe i vost ered
Pensen a goder-l lor;
E per quell qe se ved,
G'han per vu poc resguard e poc amor;
Anzi g'han fors premura qe sballee
Per raspar i vost daner.
Lu al respondè: Vui metter
In quant a quest q'al sia
Plu vera qe bojia sto vost sospet:
Coss'hoo de far-g se lor se vœren scœd
In dagn di sœ fancit tuts i caprizi,
Qe fagen a sò mœd,
al sia de lor e del so poc judizi.
Quant a mi certament
No vui sparmir nient
Per no vesser traditor de la mia pèl;
Ma no vui gnanc far a gara cont i mats
E mandar la mia roba a sac de gats,
Come se la fuss roba de rebell.
Diroo ben qe quand habien despiaser
Qe possa tirar là
Paricc agn a scampar,
El sò penser l'è defferent del mè;
In su sto pont mo sì,
Qe se la stass a mì,
El sojons quell bon vegg,
Havarev tut el jeni a far-g despecc.